جۋىردا استاناداعى «Kazakh Invest» ۇلتتىق كومپانياسىنىڭ الاڭىندا وتكەن «ورتالىق ازيا – قىتاي» فورۋمىندا قازاقستان مەن قىتاي ەلىنىڭ جەتەكشى كومپانيالارى 60-قا جۋىق كەلىسىمگە قول قويدى. سولاردىڭ ءبىرى – Shakarim University مەن Xi’an Jiaotong University (قحر) اراسىنداعى حالىقارالىق ەلەكترلىك اۆتوماتيكا زەرتحاناسىن قۇرۋ تۋرالى ماڭىزدى جوبا.
Shakarim University رەكتورى دۋمان ورىنبەكوۆتىڭ ايتۋىنشا, قوس بىردەي ءبىلىم ورداسىنىڭ عىلىمي-تەحنولوگيالىق سەرىكتەستىگى «ورتالىق ازيا – قىتاي» ەكىنشى يندۋستريالىق-يننوۆاتسيالىق ءسامميتىنىڭ باستى باعىتىنىڭ ءبىرى بولعان.
– قىتايلىق ارىپتەستەرمەن ارتىپ كەلە جاتقان سەرىكتەستىكتىڭ ارقاسىندا Shakarim University عىلىم, يندۋستريا جانە ءبىلىمنىڭ ينفراقۇرىلىم, قارجى جانە كادرلار تۇرعىسىنان توعىساتىن وڭىرلىك ورتالىعىنا اينالىپ وتىر. بۇگىنگى ترانسۇلتتىق عىلىمي ىنتىماقتاستىق مودەلىنىڭ ىسكە قوسىلۋى – وڭىردەن باستالىپ, ناقتى ناتيجە بەرۋگە باعىتتالعان جوبا. بۇل – جاستار كادرىنا قاتىستى مەملەكەتتىك ساياساتتىڭ تيىمدىلىگىن دالەلدەيدى, – دەيدى رەكتور.
سونىمەن اتالمىش زەرتحانا Xi’an Jiaotong University قولداۋىمەن Shakarim University بازاسىندا قۇرىلادى. قىتاي تاراپى 5,3 ملرد تەڭگەنى تەحنيكالىق قۇرىلعىلار, زامان تالابىنا ساي جاڭا باعدارلاما, كادرلاردى وقىتۋ جانە زەرتحانالاردى جاڭعىرتۋ ءۇشىن ءبولىپ وتىر. ال قازاقستان اۋماعى 1000 م² بولاتىن ينفراقۇرىلىم, اكىمشىلىك ۇيلەستىرۋ جانە وڭىرلىك عىلىمي-ءبىلىم بەرۋ ەكوجۇيەسىنە تولىق ينتەگراتسيا ۇسىنادى. زەرتحانا ەلەكترلىك اۆتوماتيكا, «جاسىل» لوگيستيكا, اقىلدى كولىك جۇيەلەرى, تسيفرلىق شەشىمدەر مەن ينتەللەكتۋال ءوندىرىس سالاسىنداعى قولدانبالى زەرتتەۋلەرمەن اينالىسادى. جاڭا زەرتحانا ءبىلىم مەن تەحنولوگيانى ۇشتاستىراتىن عىلىمي-ينجەنەرلىك, كادرلىق حاب رەتىندە اباي جاستارىنا جاڭا مۇمكىندىك بەرمەك.
جوبانى اباي وبلىسىندا ىسكە اسىرۋدىڭ دا ەسەبى مەن سىرى بار. زەرتحانانىڭ اباي وبلىسىندا ورنالاسۋى بىرقاتار ينفراقۇرىلىمدىق شىعىنداردى ازايتادى, ءارى «Semei – Bakhty – Tacheng» لوگيستيكالىق ءدالىزىنىڭ دە ەكى ەل ءۇشىن ماڭىزى زور. بۇل ايماقتىڭ جۇزدەگەن جاڭا جۇمىس ورنىن قۇرۋعا الەۋەتى جەتەدى. جوبا ناتيجەسىندە 10-نان استام قولدانبالى تەحنولوگيا ترانسفەرى, شاعىن يننوۆاتسيالىق كاسىپورىنداردى ىسكە قوسۋ, زياتكەرلىك مەنشىكتەن تۇسەتىن كىرىستەر, ستۋدەنتتىك جانە زەرتتەۋ جوبالارىن دامىتۋ, جوبانى قازاقستاننىڭ وزگە وڭىرلەرىندە دە اتقارۋ سىندى مۇمكىندىكتەرگە قول جەتكىزۋگە بولادى. وسىلايشا, ەكى ەل جوباسى اباي ءوڭىرىن ەلىمىزدىڭ شىعىسىنداعى تەحنولوگيالىق ماڭىزى بار تىرەك رەتىندە نىعايتۋعا جول اشادى.
اباي وبلىسى
